Sot po mbahet konferenca dyditore “American Investor Conference”

Kryetari i Prishtinës, Përparim Rama, ka thënë se kjo është një mundësi shumë e mirë për prishtinasit dhe për zhvillimin ekonomik të qytetit.

“Faleminderit për prezantimin, është shumë emocionuese të shohësh një sallë të mbushur. Kemi një numër të madh ambasadorësh këtu dhe e përshëndes edhe diasporën e dashur që është pjesë e kësaj konference.

Sot është një mëngjes i mirë. Dje mbrëma e hapëm këtë konferencë me një vizion dhe kaluam një kohë shumë të mirë bashkë, ndaj i falënderoj të gjithë”, ka thënë Rama.

Ai theksoi se Prishtina nuk është vetëm kryeqytet, por edhe një qytet i ndërtuar për investime, me popullsi të re dhe dinamike, duke shtuar se komuna është e gatshme të bashkëpunojë me të gjithë ata që shprehin interesim.

“Ne fokusohemi në sektorë që janë të gatshëm për të nesërmen. Gjithashtu, infrastruktura e gjelbër do ta bëjë Prishtinën më të pastër, më të gjelbër dhe më të rëndësishme. Teknologjia dhe inovacioni kanë potencial për tërheqjen e talenteve të rinj.

Këto projekte janë më shumë se zhvillim, ato sjellin ekspertizë dhe kapital që kanë ndikim të madh”, tha ai. /Arbresh.info